«Саhата барасай Үдэр»

Түнхэнэй Үндэһэтэнэй хүреэлэнэй мэргэжэлтэд жэлэй дүрбэн сагта Саяан хадаар байрладаг саһата барасые бэдэрхэдээ, нюулта фото-буулгабари табижа, шэнжэлгэ хэжэ байдаг. Улаан номдо оруулагдаһан үсөөн тоотой амитаниие хамгаалха тухай хэмжээ ябуулгануудые арад зоной дунда, үхибүүдэй дунда эмхидхэдэг һайн заншалтай. Жэлэй түгэсхэлдэ Түнхэнэй болон Ахын аймагуудта «Саһата барасай үдэр» гэһэн хуралдаан үнгэргэгдөө.
Ахын аймагай байгаали хамгаалгын болон аяншалгын хүүгэдэй «Барс» гэһэн түбэй хабаадалгатайгаар һонирхолтой хэмжээ ябуулга Өөрлигэй дунда һургуулиин дэргэдэ үнгэргэгдэбэ. Түнхэнэй Үндэһэтэнэй хүреэлэнэй мэргэжэлтэд аймагай багшанартай тусхай сем-нар үнгэргөө. Энэл үедэ үхибүүд байгаали хамгаалгын ажалтай танилсаа, һуралсалай викторина болон наадануудта хабаадаһан байна.
Ойдо ургадаг модонуудые тайрагдаһан хубяарнь яагаад танихаб гэһэн эрдэм мэдэсэтэй болоо. Мүн ан амитаниие мүрөөрнь танилга олондо һайшаагдаа. «Саһата барас юу эдидэг бэ?», «Хэрмэ зуража туршагты», «Зоотеатр» гэһэн викторина-нааданууд һонирхолтой байгаа гэжэ ганса үхибүүд бэшэ, мүн тэдэнэй багшанар, һургуулиин хүдэлмэрилэгшэд тэмдэглэнэ. Байгаали хамгаалдаг мэргэжэлтэдэй абаад ябадаг хэрэгсэлнүүдэй үзэсхэлэн дэлгээгдээ.
— Хуралдаамнай саһата бараста зорюулагдана. Хэды тиигэбэшье ургажа ябаа залуу халааниие байгаалидаа гамтайгаар хандан хүмүүжүүлхэ гэһэн гол зорилго урдамнай табигдана. Саһата бараста адли Улаан номдо оруулагдаһан хосоржо байһан амитан, ургамал тухай хөөрэлдөөн эндэ эмхидхэгдэнэ. Байгаалиин дэргэдэ амархадаа, аяншалхадаа, ямар дүримүүдые сахиха хэрэгтэйб, бог шорой тала дайдаар орхихогүй гэжэ үхибүүдые һурганабди, — гэжэ Түнхэнэй Үндэһэтэнэй хүреэлэнэй таһагые даагша Анжела Ильина хэлэнэ.
Ахын аймагта хэдэн һарын туршада «Саһата барасай дэбисхэр» гэжэ нэрлэгдэһэн конкурс болоһон байна. Эндэ һургуулиин үхибүүд, ехэшүүл поделкэнүүдые бэлдээ, зурагуудые зураа. Бүхы дээрээ 210 ажал конкурсдо дурадхагдаа. Хуралдаанай үедэ түрүү һуури эзэлэгшэд элирүүлэгдэжэ, «Мир вокруг тебя» гэһэн жасын бэлэг сэлэгүүдээр эрхимүүд шагнагдаа. Мүн хабаадагша бүхэн гарай бэлэгүүдые абаа.
Түнхэнэй аймагта болоһон хуралдаанай хабаадагшадые болон айлшадые Шэмхын интернат-һургуули угтан абаа. «Следопыт», «Приключения ботаников» гэһэн нааданууд һонирхол татаа. Ой модоор ябажа, уһа горхо гаталхада хэрэгтэй уялаануудые хабаадагшад хэжэ һураһан байна.
— Хуралдаанай үедэ олон наадануудта хабаадажа баярлааб. Ехэ юумэ мэдэнгүй ябааб. Түнхэнэй Үндэһэтэнэй хүреэлэнэй дэбисхэр дээрэ оройдоол дүрбэн саһан барас байрладаг гэжэ мэдэжэ абааб. Угаа үсөөн байна даа, ехэ харамтай. Тэдэ юугээ эдидэг бэ, хаана унтадаг бэ гэһэн мэдээсэлнүүд һонирхолтой байгаа, — гэжэ 7-дохи классай һурагша Алексей хөөрэнэ.
Саһата бараста зорюулагдаһан хуралдаан 2017 онһоо хойшо эмхидхэгдэнэ гээд хэлэхэ шухала.

Борис Балданов,

Буряад Yнэн.